Archive for August, 2012|Monthly archive page
ប្រស្នា
មានធម្មជាតិមួយពួក នាមដើមជាដំណាំ៖
-ប្រសិនបើ គេកាត់ជើងវាចោលហើយថែមក្បាលឱ្យវា វានឹងក្លាយទៅជារោគ
-ប្រសិនបើ គេកាត់ជើងវាហើយកាត់កន្ទុយវាទៀត វានឹងក្លាយទៅជាមនុស្ស
-ប្រសិនបើ គេកាត់តែជើងនិងរោមកន្ទុយវាខ្លះចេញ វានឹងក្លាយទៅជាវត្ថុមានតម្លៃ
-ប្រសិនបើ គេកាត់ជើងនិងកាត់រោមកន្ទុយខ្លះហើយពាក់ក្បាលឱ្យវា វានឹងក្លាយទៅ ជាសត្វ
តើដំណាំអ្វី? រោគអ្វី? មនុស្សណា? វត្ថុអ្វី? សត្វអ្វី?
ប្រស្នា
តាមក្បួនវេយ្យាករណ៍ខ្មែរ ខ្លួនខ្ញុំជាសញ្ញាមួយដែលមានឋានៈខ្ពស់នឹងគេដែរ ហើយបើ និយាយឱ្យដល់ទៀត ខ្លួនខ្ញុំគេទុកជាតំណាងអាទិទេពមួយរូប ប៉ុន្តែ បើគេបំបែកពាក្យក្នុង សញ្ញានេះចេញជាពីរម៉ាត់ ខ្លួនខ្ញុំនឹងក្លាយទៅជាអ្នកថោកទាបវិញ។
តើខ្លួនខ្ញុំនាមដើមជាអ្វី?
តើពាក្យពីរម៉ាត់ដែលបំបែកចេញទៅជាពាក្យអ្វីខ្លះ?
ប្រស្នាប្រជាប្រិយខ្មែរ
នៅពេលដែលខ្ញុំចេះកកែកករ ឳពុកម្តាយខ្ញុំបានបង្រៀនខ្ញុំឱ្យលែងចាក់ទឹកដូង។ ខ្ញុំនៅចាំបានថា រាល់ពេលដែលពួកគាត់ចាប់ផ្តើមច្រៀង គាត់បង្គាប់ខ្ញុំឱ្យយកចង្អុលដៃរបស់ខ្ញុំមកចាក់តិចៗលើបាតដៃ។ គ្រប់ពេលលែងចាក់ទឹកដូង ខ្ញុំសើចកក្អិកដោយក្តីសប្បាយរីករាយ ហើយខ្ញុំនៅចាំទំនុកច្រៀងរហូតមកដល់សព្វថ្ងៃនេះ។
“ចាក់ទឹកដូង មីឡូងមីឡា
កន្ទុយត្រីប្រា មីនាងឧក
អកកំបោរ ប្រចាំថង់
បំពង់ឫស្សី ប្រចាំវែក
ក្បាលទំពែក ក្អែកជុះអាមច៍ដាក់ប៉ក់។” Continue reading
នគរភ្នំ ឬ ហ្វូណន
បណ្ឌិត អ៊ីវ ច័ន
នៅដើមគ្រិស្តសករាជ រដ្ឋដ៏សំខាន់ជាងគេមួយក្នុងបណ្តារដ្ឋនៅអាស៊ីអាគ្នេយ៍គឺ រាជាណាចក្រខ្មែរ ដែលចិនហៅថា ហ្វូណន (Funan)។
លោក ហ្ស៊ក សឺដេស (G.Coeudes) យល់ថា ហ្វូណនត្រូវនឹងពាក្យខ្មែរបុរាណ “វ្នំ”ដែលត្រូវនឹងពាក្យខ្មែរ បច្ចុប្បន្ន “ភ្នំ”។ លោកបានបញ្ជាក់ថា ស្តេចនៅសម័យនោះមានឋានន្តរនាមថា “ស្តេចភ្នំ” ពាក្យខ្មែរបុរាណថា “កុរុងវ្នំ” ត្រូវនឹងសំស្រ្កឹតថា បវ៌តភូបាល។ លោកតែងតែយកឋានន្តរនាមនេះប្រើសម្រាប់ហៅប្រទេសដែលមានស្តេចគ្រប់គ្រងផងដែរ។ ចំពោះទម្លាប់ខាងលើនេះ លោកអៃម៉ូនីយេ (Etienne Aymonier) បានកត់សម្គាល់ឃើញថា ក្នុងសម័យ បុរាណ ចិនមិនបានវែកញែកមនុស្សឱ្យដាច់ពីប្រទេសទេ។ ពួកនេះច្រើនប្រើឈ្មោះតែ មួយសម្រាប់សម្គាល់មនុស្សផង រាជធានីផង និង ប្រទេសទាំងមូលផង ឬ ឋានន្តរនាមរបស់អ្នកដឹកនាំផង។ ដូច្នេះ ហ្វូណនជាពាក្យចិនហៅតាមឋានន្តរនាមរបស់អធិរាជនៃ អាណាចក្រភ្នំគឺ កុរុងវ្នំ ជាភ្នំដែលអធិរាជឡើងទៅជួបនឹងព្រះឥសូរ។ ឯកសារចិនបាន បញ្ជាក់ថា ព្រះអាទិទេពយាងចុះពីលើភ្នំម៉ូតាន់ (Mo-tan) ជាញឹកញាប់ ព្រះអង្គបានយក ទីនោះដើម្បីបញ្ចេញមហុទ្ធិរិទ្ធិរបស់ព្រះអង្គ ព្រះអធិរាជទាំងឡាយបានយាងទៅជួបនិង ទទួលនូវពរជ័យពីព្រះអង្គ ដើម្បីសុំសេចក្តី សុខចម្រើនជូនប្រជារាស្រ្ត។
តើរាជធានីរបស់នគរភ្នំស្ថិតនៅឯណា? បាភ្នំ ឬ អង្គរបុរី?
គ្មានញាតិផៅ (គ្រឹះស្ថានបោះពុម្ពផ្សាយយុវវ័យ)
“Sans famille”: Hector Malot
រឿង”គ្មានញាតិផៅ”ជាប្រលោមលោកឆ្លុះបញ្ចាំងពីជីវិតរបស់កសិករនៅតាមជនបទមួយក្នុងប្រទេស បារាំង ពិសេសគឺខ្សែជីវិតរបស់កុមារម្នាក់ដែលគេយកទៅបោះបង់ចោល។ ក្នុងជំនាន់ដែលអ្នកនិពន្ធសរសេររឿងនេះ ជនបទមួយចំនួនធំទូទាំងប្រទេសគ្មានសាលារៀន កូនក្មេងភាគច្រើនរស់នៅអនាថា គ្មានទីពឹង គ្មានការធានារាប់រងពីសង្គម គ្មានយុត្តិធម៌។ល។
សូមឧទ្ទិសរឿងនេះដល់កុមារទាំងអស់លើសកលលោកដែលកំពុងរងគ្រោះដោយការអត់ឃ្លាន ដោយជំងឺ និង ការព្រាត់ប្រាស់។
I
ខ្ញុំជាកុមារដែលគេបោះបង់ចោល។ ប៉ុន្តែ រហូតមកដល់ខ្ញុំមានវ័យប្រាំបីឆ្នាំ ខ្ញុំជឿថា ដូចជាកូនគេដទៃទៀតដែរ ខ្ញុំមានម្តាយ ពីព្រោះ នៅពេលខ្ញុំយំ មានស្រ្តីម្នាក់យកដៃមកអង្អែលខ្ញុំយ៉ាងស្រាលថ្មមៗ។ នៅពេលនោះ ខ្ញុំក៏ឈប់យំដោយមិនដឹងខ្លួន។
ពេលខ្ញុំដេក ខ្ញុំមិនដែលដេកម្នាក់ឯងនៅលើគ្រែដោយគ្មានស្រ្តីនោះឱបខ្ញុំទេ។ ខ្យល់រងារត្រជាក់មកពីទិសខាងជើងក្នុងខែធ្នូ ខ្ញុំឃើញនៅតាមជញ្ជាំងមានព្រិលយ៉ាងក្រាស់ គាត់យកដៃត្រកងជើងខ្ញុំដាក់ក្បែរគំនរភ្លើង ហើយច្រៀងបំពេរដោយសំឡេងដ៏សែនពិរោះ។ ខ្ញុំបានចាំទំនុកច្រៀងខ្លះៗនៅក្នុងអារម្មណ៍រហូតមកដល់ សព្វថ្ងៃនេះនៅឡើយ។
ថ្ងៃខ្លះពេលដែលខ្ញុំកំពុងឃ្វាលគោ នៅតាមបណ្តោយផ្លូវដែលមានស្មៅលាស់ខៀវខ្ចី ខ្ញុំភ្ញាក់អារម្មណ៍ដោយ សន្ធឹកខ្យល់ និង ទឹកភ្លៀង។ ឃើញដូច្នេះ គាត់រត់មករកខ្ញុំភ្លាម ហើយបង្ខំឱ្យខ្ញុំជ្រកក្រោមក្រណាត់សំពត់ធ្វើពី ជាតិឡែន។
ពេលខ្ញុំមានជម្លោះជាមួយក្មេងដទៃ គាត់ចេះលួងលោម ឬ ជួនកាលឱ្យដំបូន្មានខ្ញុំឱ្យបំបាត់ក្តីទុក្ខសោក។
នៅមានអនុស្សាវរីយ៍ជាច្រើនទៀត ដែលធ្វើឱ្យខ្ញុំអាឡោះអាល័យគ្មានថ្ងៃណាបំភ្លេចបាន។
ដោយបែបបទដែលគាត់ធ្លាប់និយាយមករកខ្ញុំ ដោយខ្សែចក្ខុដែលគាត់ធ្លាប់សម្លឹងខ្ញុំដោយការថ្នាក់ថ្នម ភាពស្លូតបូតទន់ភ្លន់ទាំងការទូន្មាន និង ស្តីបន្ទោស ខ្ញុំជឿថា គាត់ជាម្តាយរបស់ខ្ញុំ។
ភូមិកំណើតជាភូមិដែលខ្ញុំមានជីវិតរស់នៅ ពីព្រោះ ខ្ញុំគ្មានភូមិកំណើតណាទៀតទេ។ ភូមិដែលជីវិតខ្ញុំបានឆ្លង កាត់ពីកុមារភាពមក ឈ្មោះភូមិ សាវាណង់។ ភូមិនេះជាភូមិមួយក្នុងចំណោមភូមិដែលក្រៗជាងគេនៅប្រទេស បារាំងភាគកណ្តាល។
សេចក្តីក្រខ្សត់នេះ មិនមែនបណ្តាលមកពីភាពសោះអង្គើយ ឬ ខ្ជិលច្រអូសរបស់អ្នកភូមិទេ ប៉ុន្តែ បណ្តាលមក ពីស្ថានភាពភូមិសាស្រ្តទឹកដីនៅទីនោះ មិនសូវមានជីជាតិ។ ដើម្បីទទួលបានភោគផលល្អក្នុងមួយឆ្នាំៗ គេត្រូវតែប្រើប្រាស់ជី ឬ សារជាតិផ្សេងៗដែលនៅពេលនោះ ប្រទេសបារាំងខ្វះខាតទាំងស្រុង។ ដីដែលអាច ដាំដំណាំបានមានផ្ទៃតូច រីឯវាលធំធេងបានគ្របដណ្តប់ដោយដើមកន្រ្ទាំងបាយស និង រុក្ខជាតិផ្សេងៗទៀត ដែលគ្មានផលប្រយោជន៍។
ដើម្បីរកឈើល្អៗ ដែលអាចប្រើការបាន គេត្រូវតែចុះពីលើកំពូលភ្នំទៅឱ្យដល់ជ្រោះជ្រលងខាងក្រោម គេនឹងជួបប្រទះដើមស្រល់ ដើមស្ងាវ ដុះនៅទីនោះ។
នៅលើដីទួលបន្តិច ក្បែរប្រឡាយដែលមានប្រភពទឹកពីទន្លេល័រ ម្តាយខ្ញុំបានកសាងផ្ទះមួយតូច នៅដើមឆ្នាំដំបូងនៃជីវិតរបស់ខ្ញុំ។ […]
ភាពឆ្លាតវៃ
បន្ទាប់ពីបញ្ចប់ការសិក្សា អ្នកគ្រូម្នាក់បានចូលបង្រៀនក្នុងថ្ងៃទីមួយនៅវិទ្យាល័យមួយ ហើយគាត់ ត្រូវទទួលបន្ទុកថ្នាក់មួយដែលគេគ្រប់គ្នាល្បីថា ជាថ្នាក់សម្បូរសិស្សខិលៗទាំងប្រុសទាំងស្រី។ នេះជាលើកដំបូងហើយក្នុងជីវិត គាត់មានសេចក្តីខ្វល់ខ្វាយនិងភ័យជាខ្លាំង។ ថ្ងៃបវេសនកាលក៏មកដល់ គ្រាន់តែដើរមកដល់មុខថ្នាក់រៀនភ្លាម អ្នកគ្រូជំពប់ជើងដួលនៅពីមុខសិស្ស។ សិស្សទាំងអស់នាំគ្នាសើចគឹល។ គាត់សែនខ្មាស ប៉ុន្តែ ដោយភាពឆ្លាតវៃ គាត់បានផ្លាស់ប្តូរស្ថានភាពដ៏អាក្រក់នេះបានយ៉ាងល្អប្រសើរ ដោយនិយាយពាក្យមួយចំនួនទៅកាន់សិស្ស។ សិស្សគ្រប់ៗគ្នា ស្ងាត់ច្រៀប និងមានការកោត គោរពអ្នកគ្រូគ្រប់ៗគ្នា។
សំណួរ៖ តើអ្នកគ្រូបាននិយាយទៅសិស្សទាំងអស់យ៉ាងដូចម្តេច?
ប្រស្នាបែបគណិតវិទ្យា
តើត្រូវតម្រៀបលេខពី១ដល់៩ បែបណា ដើម្បីឱ្យផលបូកការេទាំងអស់ស្មើ ១៥?
|
|
|
|
|
|
|
|
|
ប្រស្នាបែបគណិតវិទ្យា
គណិតវិទូម្នាក់បានចោទប្រស្នាមួយដល់កូនៗទាំងបីនាក់របស់គាត់ថា ប្រសិនបើ គាត់មានសត្វគោចំនួន ១៧ក្បាល គាត់នឹងបែងចែកចំណែកឱ្យដល់ កូនម្នាក់ៗដូចខាងក្រោម៖
-កូនបងត្រូវបានចំណែកពាក់កណ្តាលនៃចំនួនគោទាំងអស់
-កូនបន្ទាប់ត្រូវបានចំណែក១ភាគ៣នៃចំនួនគោទាំងអស់
-កូនពៅត្រូវបានចំណែក១ភាគ៩នៃចំនួនគោទាំងអស់
តើកូនម្នាក់ៗបានទទួលចំណែកសត្វគោប៉ុន្មានក្បាល? (សត្វគោទាំងអស់នៃចំណែកត្រូវតែជាសត្វគោដែលមានជីវិត)
វីយូឡេត្តា Violetta
I. វីយូឡេត្តា វីយូឡេត្តា ឈ្មោះស្នេហាដែលចិន្តាប្រាថ្នាចាំ
Violetta Violetta … the only name which i have been waiting for
ឱ! កម្មអើយកម្ម ទ្រាំចាំយូរឆ្នាំមកហើយ។
It is so unfortunate that you have kept me waiting this long
II. វីយូឡេត្តាបុប្ផាកំសត់ រៀមសន្មតថាមិនព្រាត់ពីត្រាណត្រើយ
Violetta my dearest lover I suppose we cannot be apart
សង្សារបងអើយ ម្តេចឡើយមិនឆ្លើយវាចា។
Oh my darling why don’t you answer to my question.
R. រៀមសូមសួរចិត្ត តើគិតយ៉ាងណា?
I just want to know what you are thinking about me?
រៀមចាំទទួលវាចា វីយូឡេត្តា គ្រប់ពេលវេលា។
I will forever be waiting for your answer.
III. វីយូឡេត្តាសង្សារឧត្តម រៀមទុក្ខធំបើសិនពុំបានពុំងា
Oh Violetta my darling I will surely feel gloomy if you don’t give me a chance
មករួមជាគ្នា ជាគ្នានៅក្នុងជាតិនេះ។
to be with you for the rest of my life.
ចៀងដោយលោក ស៊ីន ស៊ីសាមុត
—?
ទឹកស្ទឹងបឹងបួររីងស្ងួតហួតអស់ តើឲ្យទ្រំារស់ៗរបៀបណា?
រដូវប្រាំងផុតសង្ឃឹមវស្សា សង្ឃឹមចិន្តានឹងបានរីករាយ។
បើជាគូរៗមកពីនាយ ខ្ញុំសូមផ្តាំតាមព្រះពាយថា
ពៅអើយពៅបងៗបងស្នេហ៍ពៅណាស់ ដល់មេឃស្រឡះសូមជួបពៅអើយ៕